قصة صورة⚘
يكولك ..
جان اكو فد رجال اسمه (ناصر) طيب وعاطفي وعلى نياته ويحب (شكرية) ومستعد يسوي كلشي حتى ياخذها بس خطية ماعنده لاصنعة بيها خير يلم منها چم فلس حتى يخطبها وحاير بزمانه
وشكرية تحبه وساطرته بكحلة العيون وتدلل وتتمنع وتتمقلج براسه فد يوم كالتله :
_ داده عيوني ناصر تره اذا متسوي چارة امي حتزوجني لجعفوري النداف تكولي هذا عنده حوش نفه براس الدربونة وصنعة .. ناصر الفگري شعنده
ناصر اتزوهر مثل السمچة وشاطت روحه وكام يهتف :
_ محددد ياخذج غيري لو اعرف أگدي بالمحله
عنده چم قلقولة باعهن وكوم اشتري شادي
وكام يطوف بالدرابين داير مداير البيوت هو والشادي
ويدگله بالدمبگ🪘والشادي يركص
والناس تذبله فلوس يسترزق .. وشاف هالكم عانة متفيد تلم مهرها لشكرية وكام يروح يم البيوت الجبيرة والزناكين ويلملم هالقاسمة الله🤍
وفات بدربونة وكعد على الدچة ياكل وغفل عن الشادي
وهذا الشادي شلولو وكمز من يمه يتمركض وناصر يصيحه وميرجع وعبر التيغة مال فد بيت عتيگ ..
دك باب البيت يريد الشادي مالته .. وحظه المصخم طلعو اصحاب هالبيت نگرية وشغلتهم الگدية وكيفو من جاهم هالشادي .. توسل بيهم خطية راد عالج ماكو !!
ميقبلون ينطوه وخشو بعينه گوتره ماكو شادي بيتنه
ورجع ناصر مهموم وحال الظيم حاله
شافته شكرية :
_ بداده شبيك نصوري تسحل بروحك وجعان ؟!
كاللها ويجر حصرات :
_ شكركر إفادي حيطك من القهر ضاع مهرج واحلى صنعة بحياتي (كام يأفأف) زلگ الشادي ببيت المگادي
ويكولك الناس بذاك الوكت سوته مثل شعبي متداول بيناتهم (زلگ الشادي ببيت المگادي)
إيييه جبناها على مدري منو
الي عجبته القصة يربح ويانه بورك باللحم العراقي
